Har du spørsmål om svindel eller mistenkjer at du er utsett for svindelforsøk? Kontakt oss snarast på 57 64 85 10.
Svindlarar rettar seg mot bedrifter – ver ekstra merksam
Kriminelle gjennomfører stadig meir målretta svindelforsøk mot personar som har tilgang til bedrifta sine kontoar. - Me oppmodar alle bedriftskundar til å vere ekstra varsame ved førespurnader om innlogging, betalingar og endringar i kontoinformasjon, seier Adm. Banksjef Mads Indrehus.
Fleire bankar opplever no ei aukande bølgje av svindelforsøk retta mot næringslivet. Svindlarane nyttar avanserte metodar for å skape tillit og få tilgang til nettbank, BankID eller pengar på bedriftskontoar.
Dei som vert kontakta, kan oppleve at svindlaren utgir seg for å vere frå banken, politiet eller offentlege etatar. Målet er ofte å få tilsette til å dele sensitive opplysningar eller godkjenne betalingar.
Banken vil aldri be om BankID-passord, kodar eller andre personlege sikkerheitsopplysningar. Er du i tvil, kontakt oss direkte.
Korleis går svindlarane fram?
Svindlarane kan mellom anna:
- Utgi seg for å vere frå banken, politiet eller offentlege etatar.
- Kontakte deg via telefon, e-post eller SMS og skape ein følelse av hastverk.
- Be om innlogging med BankID eller godkjenning av betalingar.
- Sende falske fakturaer eller lenkjer til falske innloggingssider.
- Bruke informasjon frå sosiale medium og offentlege register for å framstå truverdige.
- Påstå at bedrifta er utsett for svindel og be deg flytte pengar til ein såkalla «sikker konto».
Ver ekstra merksam dersom du får
- Førespurnader om å endre kontonummer eller betalingsinformasjon.
- Telefonar frå personar som ber om innlogging eller sikkerheitsopplysningar.
- Uventa betalingsoppdrag med kort frist.
- Meldingar om ubetalte fakturaer, inkasso eller sikkerheitsproblem som krev rask handling.
Slik reduserer du risikoen
For å styrkje tryggleiken rundt bedrifta sine kontoar anbefaler me at du:
- Aldri deler passord, kodebrikker eller BankID-opplysningar.
- Innfører to-personskontroll ved større betalingar.
- Plasserer overskotslikviditet på låst sparekonto der det er mogleg.
- Sørgjer for at alle med tilgang til bedriftskonto kjenner att vanlege svindelmetodar.
- Tek kontakt med banken straks dersom du mistenkjer svindel.
Mistenkjer du svindel? Kontakt oss med ein gong
- Dersom du trur bedrifta har blitt utsett for svindel eller har godkjent ei betaling ved ein feil, er det viktig å kontakte banken umiddelbart. Rask varsling kan vere avgjerande for å avgrense tap og auke moglegheita for å stoppe transaksjonar, seier banksjefen.
Har du spørsmål eller ynskjer råd om korleis du kan styrkje tryggleiken rundt bedrifta sine kontoar? Ta kontakt med oss i Sogn Sparebank.
